政情：今日你上鏡：發叔阿茂密斟 耐人尋味

政界早前不時傳出新界鄉議局同今屆政府因土地及原居民權益等問題，氣氛鬧得好僵。不過，前日一個活動典禮上，我哋就見到發展局局長陳茂波（Paul）同「新界王」鄉議局主席劉皇發咁啱同時出現，唔知大會係有意抑或無意，竟然仲安排咗兩人並排而坐添！咁佢哋有冇面阻阻呢？答案係冇嘅，而且仲不斷密密斟，發叔講到指手劃腳，每講幾句，阿Paul就點吓頭。唔知佢哋傾緊啲咩呢？莫非係傾丁屋政策？定係新界土地發展呢？