政情：聯盟請睇戲 鄉紳唔賞面
近日有齣講述新界丁權問題嘅電影上映，土地正義聯盟就去到元朗一間戲院包場，搞咗個電影慈善活動，話所有捐款會撥歸聯盟做未來新界發展事務。眾所周知，聯盟係反對新界東北發展，但佢哋仲唔識死咁邀請埋支持新界東北發展嘅鄉紳出席，同班村民一齊睇戲，當然班鄉紳冇畀面去睇戲啦！不過，佢哋始終都有出席電影會後嘅座談會，趁機會大談鄉事歷史，話要灌輸番啲正確訊息畀市民喎。
侯志強倡容許「套丁」
出席座談會嘅十八鄉鄉事委員會主席梁福元由清朝講到港英政府，解釋丁權嘅由來；而上水鄉委會主席侯志強就話，城鄉共融最重要，因為新界人係香港市民一分子，期望獲得公平同平等嘅眼光看待，又話如果港府取消丁屋政策，咁新界七、八十萬原居民就會去同城市人輪候公屋，大家分分鐘三十年都未上到樓。所以佢哋將向政府建議，優化丁屋政策，容許原居民「套丁」用兩個或以上丁牌嚟興建四至六層高嘅丁屋喎。