政情：白鴿 公文袋四分五裂

傳公民黨議員見面就嘈

公文袋骨幹成員貌合神離早已係公開秘密，六位議員進身立法會後漸行漸遠、各人向左走向右走，好似郭家麒、湯家驊同郭榮鏗三人早前喺上海政改之行各走各路，已足見黨內毫無隊形可言。郭家麒為保新界西票倉，亦只埋首新界議題，儼如獨孤城。至於唯一女將毛孟靜，早已盛傳同黨友陳家洛冇偈傾，近年更改行「本土」路線，唔講仲以為同新民主同盟范國威先係黨友。

有傳話公文袋成員幾乎一人一黨派，話說早前有高官幾經辛苦邀約五位公文袋議員共進早餐，想話約齊人坐低慢慢傾。豈料五位議員櫈都未坐暖已經嘈到面紅耳熱，有人更中途拍枱離席，實在難以入正題傾正經嘢。

民主黨被形容「三不像」

至於白鴿黨，亦被指分裂為三黨派，其中主席劉慧卿經常未經中委開會討論就逕自話事，以黨主席身份發表激進偉論，令黨內幾位「根正苗紅」嘅溫和老鴿相當唔服。早前幾位老鴿趁卿姐離港出席國際會議，擅自宣布考慮退出真普選聯盟，「架空」主席一說自然甚囂塵上。

至於黨內一班「孤兒」乳鴿，就轉走激進路線力求上位，好似中西區區議員許智峯接連「佔領」區議會秘書處同民政事務總署就係其中一例。可惜黨內班溫和老鴿為保票源，一直冷眼旁觀乳鴿行激進，最終外界睇班白鴿好似三不像咁，唔夠溫和又激處未算激，難怪成群老鴿、乳鴿都前路茫茫。加上公文袋眾人各懷鬼胎，泛民巨頭「合久必分」相信不遠矣，預料官員未來向佢哋拉票嘅難度亦只會更高。