政情：中環出更：潘少狂想 倡剔格仔表決
立法會經歷十四日苦戰，日前終於完成近一千二百項「拉布」式修訂，結束呢場鬧劇。要數最苦嘅相信係一班建制派議員，勞工界潘兆平（潘少）自言不但坐足十四日，近一千二百項修訂佢都逐一準確無誤咁投反對票。不過，潘少絕對冇好似主席咁患上「斯德哥爾摩症候群」，仲建議立法會「紙上表決」抗「拉布」添！
稱省時便捷 防投錯票
潘少笑稱，秘書處可以倣效賽馬會六合彩獎券咁，將「拉布」式動議表列喺張紙度，議員只要剔格仔就可以表態支持定反對，再搵掃描器一掃就知道議員表決結果，既慳番響鐘投票時間，亦唔怕流會或議員投錯票，一舉三得喎！咁講法，立法會咪淪為投票機器？如果咁都得，不如直接通知主席，逢「拉布」修訂都反對，咁仲有效率。
其實難怪潘少有呢個瘋狂想法，潘少話呢十幾日無所事事，除咗被傳媒影到佢喺網上「搜尋」黃碧雲，連主席都唔識嘅商務及經濟發展局副局長梁敬國，潘少亦已經「維基」過佢喇，所以熟讀議員同主要官員嘅資料，可能係潘少呢十幾日困坐立法會嘅唯一得着。
卓妮