政情：中環出更：黃進達：見工最緊要準時
臨近暑假，又係一眾畢業生搵工嘅時候。香港青年聯會（青聯）尋日舉辦第六屆招「工」日，各成員撐場之餘，部分仲有份參展，提供唔少知名企業職位。有青聯常務會董仲即席分享過往搵工經歷及請人要求，其中霍英東集團行政總裁霍震寰孻仔霍啟文就自爆畢業後第一份工做唔成，康泰董事總經理黃進達（Jason）就提示求職者一定要準時，否則不會被錄用。
霍啟文話，當年畢業後第一時間執靚個履歷，做好資料搜集去見工，仲得到會計師樓一個唔錯嘅就業機會添！不過佢爸爸竟然要佢放棄份工，返公司幫手。
霍啟文第一份工做唔成
啟文話，如果以起步時嘅待遇嚟計算，返家族幫手仲低人工過出面。問佢點解唔同爸爸商量吓，佢就話冇得商量，點都要返公司幫手咁話。
至於Jason就諗起自己在英國讀大學一年級時都有喺旅行社工作，即使見工時對方已知佢屋企都係開旅行社，但佢一樣做足功課，加上佢中學已經開始在爸爸間公司幫手，對行業有一定認識。雖然畢業後冇再面試，但佢就成日請人，對求職者嘅要求就係一定唔可以遲到，尤其係旅遊行業，準時好重要，錯過班飛機就好麻煩。
而當日着得靚靚嘅青聯賢慧社召集人周沁及活動副召集人鄭詩韻不約而同認為，女士見工唔需要打扮得花枝招展，端裝整齊就好足夠。講起面試，鄭詩韻透露當年畢業適逢九七金融風暴，原本三、四月時答應聘請佢嘅公司管理層都被裁走，結果佢到年底才搵到工作，勸喻年輕人搵工唔使急，最緊要準備充足。
卓妮