香港總商會尋日舉行周年會員大會，任職主席兩年嘅周松崗係時候卸任，順利由常務副主席、怡和董事彭耀佳接任。周松崗主持埋最後一次記者會，有記者行家仍然記住佢做過港鐵行政總裁，追問佢對高鐵延誤嘅責任，佢就好似之前回應咁，話不在其位、不謀其政，答完就結束咗記者會嘞。不過，就主動發言評論佔領中環行動（佔中），話商界對此非常擔心喎！
周松崗認為，佔中唔符合香港利益，就算行使權利時，都要尊重其他人嘅權利，唔好「自己害自己」。佢又話，佔中會搞到交通擠塞，隨時塞到上環、灣仔甚至新界喎，醫生、銀行、證券行交收受影響，連茶餐廳開唔到都講埋。佢仲透露，企業同保險公司對佔中應變討論增強咗，當中涉及點樣用法律方法令到闖入商舖或辦公室嘅人離開。其實高鐵延誤通車都有好大影響，點解佢又唔講呢？
總商會亦關注近日個人遊討論，周松崗話，香港係自由經濟，人太多，酒店、食物太貴咪唔嚟囉，市場識得自行調節，唔應該夾硬用行政手段減人，應該要擴大承受能力，但該會就冇提係咪要檢討一簽多行。