政情：免費北歐遊 泛民爭崩頭
立法會議會聯絡小組委員會正籌備緊今年暑假組團去北歐芬蘭、挪威、丹麥三國外訪八日，雖然今次訪問已經較過往增加多一個全費資助嘅名額至九個，但一眾議員似乎仍然覺得啲「餅仔」唔夠分。有泛民主派議員建議，如果想參加人數多過全數資助名額，不如就大家一齊攤分外訪津貼咁話。為咗攞盡資助外訪，連攤分外訪津貼咁新穎嘅建議都諗到，議員使公帑已經達到「出神入化」境界。
北歐外訪團暫定八月起行，預計每位成員開支為三萬四千多元至五萬七千多元，獲立法會全費資助嘅名額已增加至九人，而自費參加嘅名額就限定七個。根據過往做法，秘書處會根據議員所屬黨派或政團將全體議員分組，並按比例將全費資助名額分配畀各個組別。議員劉慧卿同何秀蘭（Cyd）因為係委員會嘅主席及副主席，所以佢哋會係兩人一組並只獲分配一個全費資助名額，換言之如果兩人都要去外訪的話，而其中一人又唔想自費外訪，就會調回所屬政黨嘅組別，透過協調或抽籤決定。
劉何共享一全費資助名額
不過，唔知係咪因為今次外訪嘅目的地太吸引、太值得大家去「觀摩」，結果搞到爭崩頭，泛民仲別出心裁咁諗出大家攤分外訪津貼嘅辦法。聞說卿姐同阿Cyd都有興趣去外訪，所以佢哋就決定兩個人齊齊去，再一齊攤分一個全費資助名額，咁樣就變咗一人出一半錢。泛民就建議，不如將呢個做法延伸到其他組別，咁樣就可以畀多啲人參加代表團咁話。其實獲全費資助嘅議員想益黨友，自己私底下畀番錢啲黨友咪得囉，何必要個制度破例去就大家呢？
雖然泛民對外訪興致勃勃，但建制派議員陳恒鑌（Ben）就似乎興趣不大。阿Ben話，佢休會後要隨香港青年聯會到青海及河北考察，又要隨立法會交通事務委員會外訪新加坡，擔心去埋北歐會被人揶揄佢係「旅遊界議員」，加上北歐呢啲咁美麗嘅地方都係留番同屋企人一齊去會好啲喎。