潮流興保育，港府亦唔執輸，成日將保護歷史建築掛喺口邊，可惜志大才疏，好做唔做，真正值得保留嘅歷史建築經常保唔住，反而冇乜歷史價值嘅建築往往獲得保留，簡直係本末倒置。點解會咁？咪就係因為保育政策混亂囉。
呢，一拖再拖之後，發展局及古物諮詢委員會終於就檢討歷史建築保育政策推出諮詢文件，研究係咪設立文物信託基金、應否向業主提供更多保育誘因，同埋如何制訂建築物評級準則等等。即係咁，當局肯正視歷史建築物嘅保育問題，準備推出比較完整嘅政策，總好過亂咁保育，搞到唔湯唔水，問題係講時容易做時難，保育除咗需要一套完整嘅政策，更需要財政支持，文物信託基金究竟要注資幾多，以及點樣運作，睇怕仲有排拗吖。
係人都知，香港係中西薈萃之地，唔少舊建築物既有特色，亦有歷史價值，值得好好保留，弊在港府一直唔重視，導致歷史建築買少見少，唔係被拆卸重建，就係改到面目全非。最經典嘅例子就係景賢里事件，呢幢古色古香嘅建築物，除咗有歷史價值，而且仲拍過西片，一直受到保育團體關注，原業主亦曾去信邀請港府商討點樣保育，點知一直得唔到回應。好嘞，等到新業主真金白銀買咗景賢里，開始清拆物業準備作其他用途，當局先至如夢初醒，將景賢里列為暫定古蹟，禁止繼續進行任何工程，只可惜，此時嘅景賢里已經殘缺不全，冇咗原汁原味。
經過嗰次教訓後，港府忽然保育，一口氣將一千四百幾項物業列為歷史建築，淨係一級歷史建築就有二百二十幾項，當中四十幾項屬於私人物業，結果又被指侵犯私有產權，搞到怨聲四起。咁又難怪業主反感嘅，當局將私人物業列為歷史建築後就關人個關，又冇作出賠償，又唔准發展、出售甚至出租，有業權等於冇業權，業主唔谷氣就假。好似山頂道嘅何東花園咁吖，的確值得保留，而當局亦一度列為暫定古蹟，阻止拆卸重建，但由於業主唔肯接受當局提出嘅補償條件，最後咪又係保唔住。
所以話，保育需要多方面配合，唔係話保就可以保得到嘅。最好笑嘅係，具有建築特色及歷史價值嘅何東花園保唔住，反而既冇特色又冇價值嘅舊政府總部西座得到保留，你話係咪亂咁嚟吖？
計功夫茶話齋，香港地少人多，土地資源珍貴，保育本來就唔易，加上港產官僚眼高手低，保育政策天殘地缺，唔烏龍百出至奇。依家話就話要研究點樣保育，最怕又係得個講字，好簡單，就算設立文物信託基金，都冇可能買晒所有私人歷史建築，到頭來咪又係嘥氣！