經過十幾日「拉布」，立法會尋日終於通過財政預算案撥款。日以繼夜、夜以繼日反對「拉布」嘅議員王國興唔知係咪因為「拉布」而累積大量怨氣，特別作咗首新詩狠批「拉布」三子，鬧佢哋連日「拉布」浪費咗公帑三千多萬元，係嘥緊納稅人嘅血汗錢，搞到「千萬已完」嘅「千萬議員」，喺度「嘥完千萬、還嚷未完」，又問佢哋「拉布復拉布、千萬又千萬」，究竟幾位「千萬議員」「何時玩完」呢？唔知大家覺得阿王首詩作成點呢？
