下屆區議會選舉將於明年底舉行，建制派同泛民主派各黨已開始各自就分區及人選問題作出協調。泛民素來會根據區議會協調機制作出協調，但近來民主黨（白鴿黨）同新民主同盟（新同盟）就因為三個荃灣選區爆發罵戰，互相指摘對方無賴、野蠻，未打仗先鬼打鬼爆內訌。
新同盟前兩日宣布該黨有意進攻新界西選區，仲劍指爆出桃色醜聞嘅荃灣區議員林發耿個議席。不過，新同盟立法會議員范國威（Gary）尋日投訴，話白鴿黨喺佢哋宣布有意派人出選後不足廿四小時，就通知負責協調嘅民主動力，該黨有意派人參選，搞到雙方要召開會議作出協調。Gary批評，白鴿黨知道該黨有意進攻，就即刻派人去封殺佢哋，炮轟對方以大欺小，又寸爆對方「唔夠君子」。
白鴿黨葵青區議員尹兆堅就話，該黨一直有喺象石、石圍角同綠楊三區派出社區主任服務居民，並唔存在聽到新同盟有意落區後即刻派人「截胡」，又話今次係「君子對着無賴」，被人潑政治污水咁話喎。
雖然下屆區議會選舉仲有一年多，但各黨已經就出選問題鬼打鬼，相信隨住選舉臨近，肯定鬥到七彩。