中環出更：民記四子「機械手」投錯票

激進泛民主派就財政預算案撥款嘅「拉布」戰終於告一段落，建制派終於唔使再好似機械人咁坐定定投票。不過，唔知係咪建制派議員連日來以機械式不斷投下反對票，結果尋日投票結束前就發生咗一段小插曲，就係民建聯四位議員竟然齊齊投錯反對票，反對部分修正案嘅總目納入附表，認真失魂。

該黨投錯票嘅四位議員包括黃定光（象哥）、陳恒鑌、鍾樹根及葛珮帆。按照慣例，議員投錯票後可以喺主席宣布前即時要求作出更正，但唔知四人當時係咪遊緊魂，唔記得出聲要求主席曾鈺成更正投票結果，所以佢哋最後都係當投咗反對票。

象哥就話，之前幾個星期不停投咗千幾次反對票，搞到自己隻手依家一接觸到投票機，就會自動波想投反對票。佢又話，自己只係一時唔小心投錯票，並唔係專登想投反對票幫長毛喎。不過，唔只係建制派議員，長毛亦有一條本來要投反對票嘅修正案投咗贊成票，睇嚟大家都係未擺脫到之前投足一千一百九十二項修正案嘅陰霾。

卓妮