中環出更：葉詠詩籲推廣文藝化戾氣

講到本地學習音樂嘅風氣時，葉詠詩話，香港學樂器嘅小朋友比其他地方多，但深造則較少。皆因本地家長好聰明，知道有一技之長可方便子女入讀心儀學校，逐漸形成一種風氣。而對於好多家長認為音樂搵唔到食，佢就話當一個人真係鍾意音樂，就會特別努力，成就便會更大，搵到嘅錢自然就更多，所以家長應放手讓子女去做喜歡嘅事。

楊天媧天價古琴不離身

當晚活動仲請到林耀基生前嘅得意門生、小提琴新星楊天媧獻技，佢帶埋有二百八十幾年歷史嘅古董小提琴即席演奏，古琴價值約三百萬美元，難怪佢寸步不離古琴，連影相都要孭住。基金董事之一嘅新世界發展執行董事鄭志剛（Adrian）亦有出席，原來佢讀書時都學過鋼琴，而且仲係唱得之人，對培養具潛質嘅年輕音樂才俊不遺餘力。

古董小提琴	葉詠詩（中）出身於音樂世家，日前帶埋爸爸葉惠康（左）及媽媽（右）出席活動。（葉華英攝）	鄭志剛（左二）及太太余雅穎（左一）、許曉暉（右二）及譚允芝，均是熱愛音樂之人。

基金副主席譚允芝就話，設立獎學金可發掘年輕音樂人才，仲宣布今年已經挑選咗一位年僅十六歲嘅中提琴手沈子鈺於暑假遠赴瑞士維爾比耶夏季音樂節體驗學習。同場卓妮仲見到民政事務局副局長許曉暉及監警會前主席翟紹唐（翟少），原來翟少都學過大提琴，仲喺學校樂團表演咗五年咁耐，但佢話冇考到任何級數，學校亦冇用級數衡量佢哋加入樂團嘅能力。

卓妮