年年賺大錢，年年照加價，已成為港鐵慣例。呢，今年又嚟喇，港鐵飛擒大咬，市民肉在砧板，除咗任人宰割之外，仲有乜辦法呢！
舊年盈利達到一百三十億元嘅港鐵，宣布下月底起平均加價百分之三點六，今次係連續第五年加價，加幅仲係五年來第二高添。當然喇，港鐵有可加可減機制作為擋箭牌，加價一向振振有詞，問題係，佢哋究竟有冇諗過市民感受呢？又知唔知乜嘢叫社會責任呢？
唔好唔記得，港鐵雖然係上市公司，但同時亦係全港最主要公共交通機構，而且港府仲係大股東，同基層市民日常生活息息相關，點能夠唯利是圖。冇錯，港鐵為咗掩人耳目，每次加價都提供所謂優惠，今次亦唔例外，既有「港鐵都會票」，又有早晨折扣優惠，仲話可以折上折添，可惜姿勢大過實際，呢啲所謂優惠左度右度，虛有其名，根本口惠實不至。講多無謂，食多會滯，如果港鐵真係為市民着想，喺年年賺大錢嘅情況下，唔止唔應該加價，反而應該減價，就算唔減價，最低限度都應該凍結票價喇，係咪！
最離譜嘅係，港鐵年年加價，而服務水平就每況愈下，搞到事故頻頻。以舊年為例，港鐵向當局提交咗六百七十幾宗事故調查報告，其中六十幾宗係機件故障及人為因素造成。淨係東鐵線咋，過去一年就發生三宗導致列車服務延誤超過半小時嘅機件故障，尤其係月前發生嘅訊號故障導致全線停駛半小時，港鐵事發後二十分鐘至通知傳媒，嚴重違反當局規定要喺八分鐘內知會運輸署嘅規定。港鐵話就話因為呢三宗故障合共被罰款四百萬元，但相對於每年百幾億元盈利，簡直係九牛一毛，而且被罰嘅係公司，管理層關人個關，完全無阻嚇作用。
除咗事故頻頻，港鐵負責嘅高鐵等多項鐵路工程幾乎無一不延誤，無一不超支，最近仲爆出與政府合謀隱瞞市民嘅大醜聞，而港鐵行政總裁韋達誠唔單止冇被問責，仲可以做到明年八月，袋埋約滿酬金至走，你話係咪離晒大譜吖？
正所謂，發財立品，一個人發咗達，就要識得做善事幫助有需要嘅人，一間公司年年賺大錢，更加要負起社會責任。而港鐵就啱啱相反，賺錢愈多，加價愈狠，搞到交通費不斷上漲，基層市民百上加斤。最怕港鐵加價引起骨牌效應，其他公共事業機構有樣學樣，新一輪加價潮一觸即發。有團體建議政府回購港鐵，降低交通費，其實計功夫茶話齋，政府本身就係港鐵大股東，就算唔回購，都應該負起監管責任喇。講到底，港鐵之所以好似無王管咁，對市民予取予求，咪就係因為政府失職囉！