政情：「乳鴿」佔領民政總署又衰咗
民主黨「乳鴿」中西區區議員許智峰繼上月為抗議區議會涉黑箱審批宣傳《基本法》及政改，瞓身「佔領」區議會秘書處足足四日，尋日突然再偕吳兆康、許祺祥、黃偉賢、區諾軒四隻「乳鴿」踩上民政事務總署（總署）「佔領」人哋辦公室，堅持要求同總署署長陳甘美華直接對話，可惜最後都淪為武力清場。
許智峰因不滿陳甘美華拒絕檢討區議會撥款機制等安排，尋日發起第二波佔領行動，但只係短短三個幾鐘就潰散收場。
自綁喉管 與保安爆衝突
據總署發言人指，許智峰等人帶索帶上門，將自己綑綁喺總署辦公室牆壁喉管上，又將請願標語鋪喺地板，帶埋擴音器轟炸總署員工，造成滋擾，屢勸不果下惟有請保安將佢哋帶離現場。
不過雙方各執一詞，許智峰反駁自己遭保安強行抬走時，被粗暴扯爛恤衫兼扭傷手部，連手機屏幕都喺混亂間被打爆埋，送院期間仲一度暈倒添！今次之後，許智峰話唔會再搞佔領，要再諗方法爭取同陳甘美華會面喎！班「乳鴿」仲細咩，凡事「賴死」就可以逼到人讓步？