早前傳出爭位風波嘅廣東社團總會（總會），尋日經「友好協商」選出新一屆常務會董，並推選主席及副主席等人選。一如預料，長江製衣集團行政總裁陳永棋出任總會新主席，而客屬社團聯合總會會長梁亮勝空降做常務副主席，簡松年則出任秘書長。
總會好罕有咁即時發出新聞稿公告天下，並指推選「林光如及梁亮勝等人為常務副主席」，特別凸顯咗資深副主席林光如嘅名，唔通係為咗平衡會中人士對「飛來蜢」爭位嘅不滿？
可靠消息人士話，常務副主席係今次新設嘅職位，除咗林光如及梁亮勝之外，其實仲有十幾個咁多，至於副主席亦有幾十個，淨係常務及一般副主席加加埋埋就接近五十個，認真誇張。即將落莊嘅呢一屆副主席都只係廿三個，可見新一屆嘅副主席位多咗好多。新一屆班子將於七月一日接棒，任期至一七年六月底。