中環出更：拉布搞出事 長毛示威險中「蕉」
激進泛民主派立法會議員多次在議會向特首以至高官投擲物件，撐政府組織「愛港之聲」廿幾人就趁尋日行政會議前走去特首辦示威，帶備銅鑼敲打高叫口號，批評有議員騎劫立法會，又鬧四名喺預算案「拉布」嘅議員「快快丟落垃圾桶」。本來一隻碗未必敲得響，點知「爭取全民退休保障聯席」廿幾人尋日都去行會示威，陪同佢哋嘅社民連梁國雄（長毛）一到場便成為眾矢之的。
與愛港之聲成員互罵
唔少上咗年紀嘅愛港之聲成員，一見到長毛就破口大罵，話佢掟蕉又霸佔公屋。長毛點都唔肯走，企喺佢哋面前，反叫佢哋返大陸同飲美沙酮。雙方口角之際，我哋就目睹愛港之聲嗰邊向長毛方向掟出一隻蕉，最後跌落後面草叢，但似乎掟蕉嘅人眼界唔多好，距離掟中長毛都仲差好遠。
我哋事後問番愛港之聲召集人高達斌，佢話當時入咗特首辦示威區，見唔到掟嘢情況，又話唔一定係佢哋掟嘢。不過，佢話就算係有人掟蕉，都只係等長毛感受下不被尊重嘅滋味，「以其人之道，還治其人之身」喎。或者掟唔中都係好事，唔係隨時會惹上官非！
卓妮