係人都知，房屋問題係現屆政府施政重中之重，一時寸土必爭，一時見縫插針，甚至連郊野公園都唔放過，搞到畀人話盲搶地，但結果依然得個吉。究竟點解？答案好簡單，當局病急亂投醫，既無規劃，又無章法，連舊區重建都係小修小補，又點可能有好結果。
好似土瓜灣咁吖，港府二十年前已經提出重建，仲話要採取區域為本嘅重建策略，將紅磡、土瓜灣、馬頭圍、九龍城同啟德新區一併發展，講就好聽喇，但時至今日，土瓜灣變成點呢？變就係變咗，不過係變得更差，舊樓愈來愈多，交通愈來愈亂，所謂嘅重建大計無影無蹤，都唔知好嬲定好笑。
嗱，市建局話就話喺土瓜灣有八個重建項目，點知全部係單幢式物業，地盤又細，單位又少，只能興建「牙籤樓」，對增加房屋供應幫助不大，而且有損市容添。正如「東方報業民意調查」顯示，四成九受訪者斥重建進度緩慢，無效率；兩成四批評紙上談兵，得把口；兩成二指志大才疏，蹉跎歲月。對於當局一味興建「牙籤樓」，三成七認為插針式重建無助未來規劃；三成六斥浪費發展大型社區的潛力；兩成一批評與綜合發展計劃背道而馳。
冇錯嘞，當局舊區重建一味零敲碎打，起來起去都係牙籤樓，點會有好成績吖。最搞笑嘅係，市建局推出只有三年嘅需求主導計劃，八個項目總共虧蝕近三十億元，市建局見無利可圖，即刻想縮沙，提議收緊重建門檻，由原本只需六成七業主同意提高到八成，仲要求地盤面積必須有六百平方米，否則唔可以啟動申請。
咁搞法，即係打擊舊樓業主重建意欲，令舊樓問題更加惡化啫。大家應該仲記得，三年前紅磡及土瓜灣先後發生塌樓及舊樓火警死人事故，舊樓安全引起社會關注，當局先至推出需求主導計劃，點知家陣市建局竟然開倒車，你話舊區重建究竟仲要拖到幾時呢？
唔係危言聳聽o架，目前五十年以上樓齡嘅舊樓達六千幢，而且數目只會有增無減，當中唔少缺乏維修及保養，導致甩皮甩骨，危機重重，就好似一個個計時炸彈咁，當局冇諗辦法加快重建，反而開倒車，簡直不可思議。講到底，市區重建唔能夠依靠市建局單打獨鬥，必須全盤規劃、綜合式發展，先至可以事半功倍。以土瓜灣為例，地理位置優越，加上日後沙中線通車，發展潛力更大，大有條件打造為「東九龍麗港城」，何樂而不為呢？
正如北大人話齋，只要思想不滑坡，辦法總比困難多。房屋問題又好，舊區重建又好，辦法唔係冇，問題係當局有冇決心，肯唔肯承擔啫！