政情：公民講場：厚顏鬍鬚曾 仲提強積金？！

社民連議員梁國雄針對預算案喺立法會發動拉布，主要係想逼使政府落實全民退休保障制度。財政司司長曾俊華（鬍鬚曾）尋日喺網誌反駁，強調退休保障制度係長遠、重要兼複雜嘅課題，唔可以草率決定，更不應該用嚟作為討價還價嘅棋子。之後佢又提到強積金制度已推行接近廿年，承認該制度有好多改善空間，依家或者係適當時間出檢討。其實市民近年對強積金制度愈趨不滿、多咗人支持設立全新嘅全民退休保障制度，觸發點正正係鬍鬚曾喺一一年預算案，提出向全港市民嘅強積金戶口注資六千元，鬍鬚曾當年更被迫「跪低」改向全民派錢六千元，真係估唔到佢仲有面提起「強積金」呢三隻字囉！