中環出更：走過水客勝地 姚思榮：好嚴重
卓妮除咗成日蒲中環，有時亦會北上購物同探吓朋友，早幾日經過上水港鐵站，竟然撞到立法會旅遊界議員姚思榮同幾位男士周圍視察，而且平日西裝骨骨嘅姚思榮，今次仲全身街坊look，唔通身為中旅社高層嘅佢，特登同埋幾位同事微服出巡，巡視吓上水區有乜新旅遊景點？卓妮睇真啲，發現其中一位同行男士，原來係外號「金金大師」嘅北區水貨客關注組發言人梁金成，唔通連姚思榮都想搞「驅蝗」？原來金金大師係約咗姚思榮，首次親身到上水站視察水貨客為患嘅問題。
卓妮直擊姚思榮同金金大師先從上水站出發，但行咗幾分鐘都見唔到有水貨客聚集，原來班水貨客已經學精晒，唔再集中喺站內或站外活動，改為喺上水石湖墟晉科工業中心同劍橋廣場一帶上貨。好在金金大師熟晒門路，帶姚思榮尋找水貨客蹤影。
畀「益力多牆」嚇親
期間行經一檔水貨店時，見慣大場面嘅姚思榮，亦疑似被門外嘅一幅「益力多牆」嚇親。喺外圍行咗約半個鐘頭之後，金金大師再帶姚思榮造訪最多水貨客聚集嘅「巷仔街」，卓妮當然唔客氣跟埋入去，發現該處有如七、八十年代嘅九龍城寨三不管地帶，一條三、四十米長，僅由鐵皮屋搭成嘅小巷仔，已有近十間水貨店成行成市、生意滔滔不絕，舖外仲明目張膽掛上「價目表」，清楚寫住「走一轉」奶粉可以賺幾多錢。「價目表」顯示，現時最搶手嘅水貨已經唔係奶粉、尿片、或者金莎同益力多等食品，而係一箱箱嘅蘆薈藥膏。兩人最後行咗超過一個鐘先收隊。
支持取消一簽多行
姚思榮事後話，自己係第一次親身到上水視察水貨活動，認為問題比佢想像中嚴重好多，開頭以為只係部分市民自發性走水貨，但現在發現係集團式經營，並已形成一個成熟嘅產業鏈。
身為旅遊界議員，佢亦支持政府逐步取消一簽多行，改為一簽一行以提高水貨客成本，以及盡快喺邊境開設旅客購物中心，咁就可以減少對香港居民嘅影響，同時唔會令到啲合法商舖同水貨客冇晒生意。
卓妮