一之為甚，豈可再乎。舊年財政預算案遇到立法會拉布，議事堂上嘈喧巴閉，烏煙瘴氣，今年激進政客食過翻尋味，再次以拉布狙擊預算案，結果又係搞到滿城風雨，神憎鬼厭。好嘞，立法會主席終於忍唔住，再次祭出撒手鐧，準備一剪了之。
件事係咁嘅，由於拉布戰已經持續多日，幾時可以結束，依然遙遙無期，立法會主席曾鈺成宣布就餘下嘅辯論設定時間表，限制議員發言時間，希望下月四日完成所有程序，簡單講即係剪布咁解。本來呢，你有權拉布，佢有權剪布，大家都冇話好說，何況拉布嘅議員噏咗咁多日廢話，自己都可能覺得厭煩喇，既然有人剪布咯喎，咪乘機鳴金收兵囉，佢哋指摘剪布嘅決定係剝奪議員權利，不過係揦番拃沙啫。依家嘅問題係，喺拉布已經成為立法會常態嘅情況下，今次可以剪布，咁下次又點呢？唔通不斷重複拉布及剪布嘅鬧劇？唔通香港就咁繼續沉淪落去？
功夫茶唔係危言聳聽，香港愈來愈政治化，部分政客為反對而反對，唔理三七二十一，任何議題都可以拉個不亦樂乎。呢，除咗預算案受到狙擊之外，「一堆一爐」及新界東北發展前期工程撥款申請同樣遇到拉布，立法會直情好似戰場咁，日日炮聲隆隆，令人不勝其煩。即係咁，審議預算案係立法會嘅權力，監察政府係議員嘅職責，呢點冇人反對，但如果樣樣嘢都上綱上線，大小事都拉布阻撓，咁唔止令人討厭，直情阻住地球轉。就以預算案嚟講吖，如果沒完沒了繼續拉落去，港府最後墮入「財政懸崖」，連綜援金及其他社會福利都發唔出，受害嘅咪又係基層市民，隨時連議員自己都冇糧出添吖。
唔怪得立法會被人稱為垃圾會喇，部分政客不務正業，一味譁眾取寵，搞到議事堂七國咁亂，簡直連垃圾都不如。當然，政客之所以有機可乘，講到底都係政府無能造成，如果唔係港產官僚施政混亂，授人以柄，政客就算想拉布都未必有機會喇。今次激進議員拉布嘅理由係當局遲遲唔肯推行全民退休保障，而呢點已經成為社會共識，港府始終唔肯正視民意，以各種理由一拖再拖，卒之搞到年年拉布，唔衰攞嚟衰。
所以話，香港沉淪唔係冇理由，政府無能，政客無良，人人掛住做騷搞政治，根本冇人關心經濟及民生，香港又點會有運行呢？咪話功夫茶唔提醒吖，香港競爭力一跌再跌，除咗被新加坡後來居上，內地城市亦紛紛從後趕上，再咁落去，香港想唔邊緣化都幾難！