政情：幫仔女改洋名 梁繼昌鍾情愛爾蘭
立法會議員經過漫長嘅財政預算案撥款「拉布」戰後，梗係心急想放暑假鬆番吓。會計界議員梁繼昌（Kenneth）就計劃七月底休會後，同太太及一對仔女去愛爾蘭玩十幾日。唔講唔知，原來Kenneth同愛爾蘭好有淵源，就連佢囡囡Siobhan同囝囝Kieran個名都係源自愛爾蘭。
與妻喺當地有甜蜜回憶
話說Kenneth當年喺英國讀書，畢業後喺當地工作時，佢嘅包租婆就係愛爾蘭人，而佢十幾年前同太太去愛爾蘭旅行，遊車河、睇吓風景更加係佢重要嘅回憶。佢憶述，當年同太太喺愛爾蘭嘅湖邊釣魚，釣到魚就用柴枝生火即燒即食，諗起都滋味。
Kenneth鍾情愛爾蘭，就連幫一對仔女改名都係用愛爾蘭名。好似囡囡個名Siobhan咁，就係太太Jane英文名嘅愛爾蘭版，而佢囝囝個英文名，就揀咗佢喺英國工作時嘅公司主席名字Kieran，同佢個英文名都係一樣「K」字頭咁話。