政情：被團體揼心口 鄉局唔順氣？
位於沙田石門嘅鄉議局大樓有大戲院、演奏廳、大禮堂、會議室、圖書館及停車場等設施，吸引好多外來團體租用。話說前日鄉議局開執委會會議，期間討論有關香港工商專業協進會（協進會）想租用大樓場地搞七一活動，但唔知點解鄉紳們似乎特別關注呢個議程，由原定傾五分鐘，最後傾足半個鐘。咁認真，據聞係局方不甘心被租用團體揼心口贊助有關活動。
借場合辦活動贊助10萬
根據鄉議局嘅文件顯示，協進會在早幾日先至去信鄉議局，「知會」佢哋會借個場嚟搞七一活動，又問局方會否做合辦機構或參與機構，如果合辦就要科水十萬元贊助費，而參與性質就隨緣樂助。不過，原來民政事務總署都係今次活動協辦機構之一，所以有委員話，如果總署要求鄉議局免費提供場地，局方冇得話唔可以，但就要支付租場費用，最後大家嘅結論係要檢討租場嘅細節及條款。
其實根據鄉議局場地租借費用列表，一般團體租用大禮堂四小時要近一萬四千元租金，而非牟利團體就有六五折，所以租場唔係免費嘅。咁究竟班鄉紳勞氣啲乜呢？莫非被人揼心口贊助活動心有不甘？