政情：創科局仍未開 莫乃光搶閘設委會
商務及經濟發展局尋日就向立法會提交文件，話會喺下月向立法會提出成立創新及科技局嘅決議案。點知資訊科技界議員莫乃光（Charles）尋日就搶閘去信內務委員會主席梁君彥，要求喺明日討論為設立創科局成立小組委員會。Charles話，依家會議時間緊迫，加上預咗有議員會就成立創科局「拉布」，所以早啲提出成立小組，望賺多一星期時間，可望喺七月休會前通過。
及早提出成立 爭取時間
Charles就話，依家大會積落唔少議員動議，就算預算案「拉布」完結，相信之後嘅周三至周五都要處理積落嘅議程，換言之其他委員會就只能選擇周一、二開會，所以及早提出成立小組委員會，希望可以爭取多啲時間。至於做唔做小組委員會主席，佢就話冇咩所謂喎。
對於議員陳偉業早就揚言會就成立創科局「拉布」抗議，但Charles估計小組委員會唔會係「拉布」主場。
政府要就成立創科局開設新職位，又要申請撥款，故預料議員會喺人事編制委員會及財委會「拉布」。為咗令創科局盡快成立，佢話會努力做好游說工作。