政情：翟紹唐「夠鐘」仲未交到棒
激進勢力抬頭令警民關係日差，加上「六四」、「七一」甚至「佔領中環」行動呢類傳統易生事端嘅日子逼近，警方接收投訴勢必排山倒海。不過，監察警方處理投訴委員會（監警會）近日都好頭痕，除咗先後有委員即將約滿離隊，原來本月底任期屆滿嘅監警會主席一職，盛傳到呢一刻都未搵到合適人選，咁現任主席翟紹唐會否多坐一會？
曾有被薦人臨門「縮沙」
監警會難搵人捱義氣，我哋去年已經報道過，繼前社聯行政總裁方敏生及港大法律學院首席講師張達明兩名委員今年底「夠鐘」走人，主席一職亦因為警民關係近年進入「冰河時期」而頓成燙手山芋。
對於新任主席人選，盛傳監警會早有委員毛遂自薦，可惜當事人多年來是非多多、缺乏法律背景兼其「梁粉」色彩濃厚，未「起跑」已宣布被叮走。另有局內人透露，律政司曾向保安局推薦一位資深大律師出任，可惜嗰位資深大狀埋門一腳「縮沙」，令遴選過程再添波折。
眾所周知，監警會主席唔易做，除咗要喺警方、市民之間保持中立，仲要經中央政策組全職顧問高靜芝及保安局首肯「過兩關」，加上政府向來有不成文規定，監警會主席傾向由資深大律師或退休法官出任，所以過去四任監警會（前稱警監會）主席都係由資深大律師出任。
恐破例非資深大狀接任
可惜嘅係，全港資深大律師加埋都冇一百個，要搵無黨無派又肯捱義氣接掌呢個燙手山芋嘅資深大狀更係少之又少。難怪有委員坦言，即使新任主席破例由非資深大狀出任都唔感驚訝，因為實在太難搵人喇。咁現任主席翟紹唐有冇可能多坐一會？據知監警會一眾同事本月初先為翟舉行歡送派對，翟個人亦早已表明無意破例續任，要佢回心轉意似乎唔係易事。假若主席真係由非資深大狀接任，相信又會引起一輪非議。