中環出更：搞港版東大門 鍾國斌要「資」援
立法會紡織及製衣界議員鍾國斌（Felix）去年開始推動將長沙灣一帶成衣業界聚集起來，打造港版南韓首爾東大門，變成流行服飾集散地。不過，所謂「三軍未動、糧草先行」，冇錢就乜都唔使講，所以佢打算揼政府各種基金心口，連賽馬會都係考慮之列，估計要百幾二百萬元。
諗住搵政府幫手
Felix坦言，如果要貿易發展局或旅遊發展局幫手宣傳，「東大門」就要以非牟利團體形式運作，所以佢就以香港製衣同業協進會名義籌辦。睇番資料，佢係協進會永遠榮譽會長，要搞相信都唔係太難。至於資金方面，佢就話會考慮搵民政事務總署「伙伴倡自強」社區協作計劃、工業貿易署中小企業發展支援基金，以至馬會慈善信託基金，但寫計劃書等程序繁複，估計都要搞一年半載。
Felix話，暫時已經搵到三幅地，其中兩幅屬於工廈，一幅就係細商場，面積合共有過萬呎，相信可以做到好似馬會都有份贊助、位於中環嘅元創方（PMQ）咁，租畀新進設計師開檔，租金就希望係PMQ嘅一半喎。
卓妮