立法會資訊科技及廣播事務委員會今日舉行公聽會，六十多個業界團體或個人將就IT認可架構表達意見，不過未討論就爆出業界矛盾，自言喺業界浸淫三十年嘅立法會議員鍾樹根為首嘅反對派，力數政府資訊科技總監賴錫璋涉利益衝突，資訊科技界議員莫乃光（Charles）則反擊指：「樹根有乜專業學會資格？」資訊科技界嘅內部矛盾一觸即發。
樹根批評香港電腦學會日後於IT認可架構將有「高人一等」嘅影響力，曾任電腦學會會長嘅賴錫璋涉有利益衝突，有藉此打壓業界其他屬會之嫌。再者IT認可架構未有同內地專業互認，加上涉及公帑，十分不當，仲質疑點解唔等創新及科技局成立後至跟進？
Charles就反擊指，IT認可架構早於○四年即開始爭取設立，反問樹根自言有三十年業界經驗，究竟擁有邊啲專業學會資格。業界中人亦為賴抱不平，懷疑建制派不滿賴當日喺鬧到滿城風雨嘅「上網學習支援計劃」一事揸正嚟做，變相炮打建制派既得利益者，所以趁機報復喎。