有功就領，有鑊就卸，從來都係港產官僚嘅拿手好戲。呢，話口未完，又有新戲碼上演啦！
係咁嘅，港鐵日前聲稱收到政府通知，話由於高鐵項目嚴重超支兼延誤，希望港鐵盡力追番進度同控制開支，再有延誤同增支，港鐵要自己埋單，港府唔會包底喎。
嗱，高鐵工程一拖再拖，成本一漲再漲，有人估計最終冇一千億元落唔到樓，到時民怨沸騰咯喎，主事官員肯定唔止「不斷反省」咁簡單。可能因為咁，港府打定預防針，事先張揚唔會填呢個無底洞，無非想推卸責任啫，問題係，高鐵工程尾大不掉，港鐵固然有責任，港府監管不力同樣難辭其咎，想卸責睇怕冇咁易咯。
即係咁，高鐵工程嚴重延誤，無法如期通車，港鐵賴得就賴，一時話黑雨浸壞機器，一時話地硬，一時又話人手不足，連行政總裁韋達誠明年約滿唔再續約嘅安排，港鐵都秘而不宣，一個大話冚一個大話，簡直誠信掃地。而港府亦唔好得去邊，對於高鐵咁重要嘅基建項目，居然一直不聞不問，出咗事淨係識得「驚訝」同「失望」。港府先係監管不力，繼而同港鐵夾埋欺騙市民，依家居然玩埋卸膊，實在豈有此理。
所以話啫，港府同港鐵一擔擔，五十步笑百步，唔使旨意推卸責任，關人個關呀！再講喇，港鐵向來貪得無厭，要自己出錢填氹喎，豈不是與虎謀皮？聽吓佢哋點講吖喇，港鐵話喎，當初同港府簽訂委託協議時，列明港府會支付所有建造同顧問費用；佢哋仲反咬一口，話港府雖然已經支付四十幾億元項目管理費，但有關費用會按委託協議變動，如果出現大幅增加，會同港府傾掂佢。聽到未吖，講到金錢，港鐵一向算死草，點肯自己孭呢隻鑊吖，港府企圖交波卸責，只係一廂情願咋。
港府港鐵互扯貓尾，傾唔埋欄，最終好可能搞到司法覆核對簿公堂嘅咋。你知啦，官司曠日持久，等於燒銀紙咁滯，到頭來咪又係搵納稅人嚟搞。退一步講，即使超支費用由港鐵負責，唔使問阿貴，羊毛出在羊身上，蝕底嘅一樣係市民。
正所謂，早知今日，何必當初。如果港府負起本身嘅監管責任，一早 （目及）實港鐵，又點會搞到咁嘅田地吖。當局亡羊補牢，九龍東單軌列車營運權好可能撇甩港鐵，改為公開招標。其實，港鐵表現有口皆悲，加上誠信破產，固然應該被叮走，而港產官僚監管失職，同樣應該冇得留低，否則，點樣體現問責精神？