香港政圈權力排行榜中，相信行政會議成員一定排喺首位，因為最接近權力核心，可獲得第一手政策情報。不過，有得必有失，據聞每個非官守成員每年最少要夾三萬元做「應酬費」，而每月宴請社會不同人士，全靠每月筆酬金支付，唔似得立法會議員每月可以申領酬酢及交通開支償還款項，份酬金七除八扣後真係冇咗一大截。
現時行會召集人每月有十一萬一千六百九十元酬金，普通非官守成員就有六萬九千七百五十元，佢哋平時食飯宴客斟茶灌水就係靠呢筆使費。此外，按傳統每月舉辦一次嘅「Thursday lunch」（星期四行會午宴），一眾行會成員亦要自行科水。呢個午宴以往係同銀行大班及頂尖商賈摸酒杯底、商討政經大事嘅收風場地，每次喺中環一間高級酒店舉行。不過近年出席人士嘅級數愈來愈低，連不知名地區人士都獲邀，偏偏收費愈來愈貴，每位賓客要收取七百多元，搞到冇乜行會成員肯出席。有人話錢銀事少，收唔到風先至事大，出席只會浪費時間，所以應酬過就算數喇。