政情：關詠軒：冇諗過退出新民黨
早前有傳新民黨執委關詠軒（Doris）同中委吳有家教授雙雙退黨，當日我哋搵唔到佢哋親身回應，近日兩人先後搵我哋澄清，強調佢哋並冇、亦從來冇諗過退黨。其中吳教授表示會努力繼續籌款，Doris就一併澄清埋多項針對佢嘅不利傳聞。
好欣賞葉太為人理念
Doris同我哋講，佢同新民黨主席葉劉淑儀都係聖士提反女子中學嘅校友，喺○六年正式認識對方，自始好欣賞葉太嘅為人同理念，喺匯賢智庫創立時已經合作幫手。其後葉太成立新民黨，Doris亦積極參與，因此佢對個黨好有感情，亦好認同該黨標榜中產、理性嘅立場同定位，自己冇理由、亦冇本事拉埋其他黨員一齊離開。若真係有其他人退黨，都係佢哋自己嘅選擇。
Doris又指出，佢一直好關心青年向上流事務，喺一一年區議會選舉協助黨內年輕人參選，之後又喺一二年嘅立法會新界西直選，擔任新民黨副主席田北辰嘅競選經理，成功協助對方晉身立法會。對於有指佢不滿田北辰唔識「知恩圖報」，並轉投新民黨另一副主席鄭承隆一方，Doris強調自己對個黨出心出力，「絕冇任何貪圖」，又認為田鄭二人同為該黨副主席，儘管性格同處事作風等有異，但佢冇理由只幫其中一方做嘢，而唔理另外一方，因此根本唔存在佢加入任何陣營嘅問題。Doris之前身體不適，但依家已好轉，佢希望平衡到健康同家庭時間分配，做好各方面工作。