立法會政府帳目委員會明日會繼續就盛事基金成效不彰進行第二次公開聆訊，委員會主席石禮謙（大舊石）尋日喺閉門會議上話想傳召商務及經濟發展局長蘇錦樑（Greg蘇）出席聆訊。不過，Greg蘇明明都冇出席第一次聆訊，所以建制派咁做，擺明就係想「圍魏救趙」，希望借擺Greg蘇上枱，放生盛事基金主席林健鋒（Jeffrey），等佢唔使做箭靶被人圍插。
據聞上次會議有份作供嘅導演高志森因為唔喺香港，預料委員會喺明日第二次會議集中向龍獅節籌委會召集人陳鑑林質詢。不過，唔知點解尋日帳委會召開閉門會議時，大舊石突然心血來潮話要傳召Greg蘇上帳委會，搞到其他委員百思不得其解，唔明點解有商務及經濟發展局常任秘書長（工商及旅遊）黃灝玄為局方政策解畫，無端端又要叫埋Greg蘇。
不過，大舊石根本就唔係有問題想問Greg蘇，而係想將焦點轉去局長身上，等佢黨友Jeffrey可以乘機甩身。咁又係，當Greg蘇一出席帳委會，委員就會鬧爆當局監管不力，又點會有時間鬧Jeffrey辦事不力呢？據聞Greg蘇明日應該仲喺青島出席亞太經合組織貿易部長會議，但唔緊要，因為帳委會話點都會等佢返港出席會議喎，睇嚟佢都係走唔甩o架喇！