政情：騰雞美華 靜雞雞補鑊
早前乳鴿中西區區議員許智峰早前大鬧區議會，又同區內其他議員因為啲濕碎事起爭議，雖然行為「小學雞」，但就揭發區議會甩漏多多，兼且存在黑廂作業問題，包括好多文件只需要內部傳閱就可獲通過，亦唔使放上網，認真兒戲。不過，民政事務總署（總署）最近企圖補鑊，下令各區嗱嗱聲將所有文件上載到區議會網頁，莫非外號「騰雞美華」嘅署長陳甘美華擔心事件會升溫，所以就搞到好騰雞？
極速更新各區會網站
事緣早前中西區區議會開會審議推廣《基本法》宣傳工作二十五萬元撥款時，許智峰就質疑會議黑廂作業，建制派涉嫌利益衝突，於是大鬧區議會，甚至發展到後來嘅絕食靜坐。其後該黨高調召開記者會、在立法會質詢有關區議會工作嘅透明度及審批撥款方式、以及相約陳甘美華會面討論事件。就喺會面之前，有人就發現總署不動聲色開始陸續更新十八區區議會網站，據聞，中西區個網站係最快更新嘅一個。
據理解，總署唔單止將資料文件及傳閱文件上載到網站，就連喺工作小組及各大小委員會項目中，都列出各委員會職權範圍、成員名單及會議文件同錄音添！總署突然咁高效率，極速提高區議會透明度，莫非見勢色唔對，於是急急補鑊？民政事務局就回應話，如果唔係涉及閉門會議嘅事項，區議會秘書處一般都會將相關文件上載至網站，秘書處亦都會安排加強服務，在人手許可下，將傳閱文件同補充資料都上載至網站喎。其實講來講去，咪係出咗事先識得做嘢囉！
政治敏感低 搞出大頭佛
陳甘美華除咗後知後覺外，亦反映佢嘅政治危機意識不足，何解呢？其實二十五萬元撥款對區議會來說，話多唔多，話少唔少，可惜呢筆撥款用作推廣《基本法》，就變得相當敏感，尤其在現時複雜政局環境之中，隨時成為泛民主派嘅攻擊「彈藥」，陳甘美華作為高官冇可能預視唔到，一味放晒手畀建制派去搞，結果咪搞出個大頭佛囉！