對中國人嚟講，八國聯軍侵華係一段不堪回首嘅歷史，呢段歷史雖然已經過咗百幾年，但直到今日仍然不斷重複緊。呢，隨着美國加緊重返亞太嘅步伐，日本、菲律賓、越南等國家狐假虎威，愈來愈囂張，大有聯手圍攻中國之勢，搞到烽煙四起，惡浪滾滾，同當年嘅歷史真係有幾分相似。
不過咁，功夫茶今日想講嘅唔係呢段歷史，而係八國聯軍治港嘅全新戲碼。件事係咁嘅，曾經畀中方點名批評喺香港搞風搞雨嘅美國駐港總領事夏千福，日前又出動喇，呢次仲帶埋英國、日本、加拿大、澳洲、新西蘭、印度、德國嘅領事，組成「八國聯軍」浩浩蕩蕩操去深水埗。佢哋首先探訪「惜食堂」，幫手派發食物畀弱勢社群，跟住又去一間燒臘飯店，探訪以免費派飯畀窮人而出名嘅明哥。一眾領事粉墨登場，聯手做咗一場體察民情、訪貧問苦嘅大龍鳳，令人嘆為觀止。
咁就奇喇，做親民騷本應係港府官員嘅責任，呢班外國領事越俎代庖，究竟所為何事呢？正所謂，無事獻殷勤，非奸即盜，夏千福一向高調，佢嚟港唔夠一年，除咗頻頻與反對派人士密會傾偈，亦經常造訪各區，遍嘗各種地道美食，仲影埋相放上網添，慌死中方唔知佢喺香港搞搞震。今次佢聯同其他領事齊齊行動，如果話淨係為咗訪貧問苦，細路仔都唔信喇。
大家都知道，今年係香港嘅政改年，政治氣氛零舍詭異，佔領中環蓄勢待發，呢班外國領事偏偏喺呢個時候出動，究竟有乜動機，畫公仔唔使畫出腸嘞啩。北大人成日話反對外部勢力干預香港事務，其實，外部勢力對香港嘅干預早就無處不在，無孔不入，尤其二○一七年普選特首，正係奪取香港管治權嘅良機，外部勢力又點會放棄吖。山雨欲來風滿樓，八國聯軍嘅動作睇怕陸續有來，好戲在後頭。
講開又講，特首梁振英上台初期，聲稱要帶住「一張櫈、一本簿、一支筆」落區聆聽民意，點知聽咗幾次之後就冇晒下文，唔通只有三分鐘熱度？或者怕咗激進反對派嘅圍堵？既然港府高官唔再落區咯喎，夏千福組成八國聯軍代勞又何足為奇。唔知係有意定無意，攞景定贈興，根據英國駐港領事館上載嘅相片，當日個個領事都抓住把刀，你話北大人見到驚唔驚吖？
所以話，甲午年特別容易招災惹火，真係冇講錯。東海南海局勢緊張，隨時擦槍走火，重演八國聯軍侵華歷史；而香港亦特別「猛鬼」，八國聯軍治港逐漸成為事實。你話嘞，今時今日內憂外患，北大人自顧不暇，又點管得到香港吖！