政治人物好講求反應快，如果一不留神反應慢半拍，就已經被對手截胡。好似最近工務小組審議「一堆一爐」撥款時被泛民主派議員玩「拉布」，分分鐘搞到瑪麗醫院重建工程拖慢，議員范國威一早已經去信要求政府將瑪麗醫院項目「打尖」優先審議，但公民黨（公文袋）陳家洛去到尋日下午五點先慢幾拍去信政府要求做同樣嘅嘢，呢啲咪執輸行頭囉。
公文袋慢幾拍已經唔係第一次，早幾日鴨脷洲海怡西商場爆發「outlet（特賣場）」風波，幾大政黨都急急派人飛去台北同商場嘅大業主磋商，而公文袋都係最慢嗰個，直頭係「執四攤」。
不過，要求瑪麗醫院優先審議單嘢，原來公文袋都未算最遲，話說陳家洛下晝五點幾鐘發出新聞稿後，七點幾鐘就輪到近期另一「紅人」西貢區區議員方國珊，又係去信要求政府同一樣嘢。不過，講到底方國珊都唔係立法會議員，所以陳家洛始終都係最慢嗰個囉。