真普選聯盟（真普聯）內部立立亂，「民主阿婆」前政務司司長陳方安生即時跳出來企圖指點江山，自然令人聯想佢係咪想拉攏溫和民主派另起爐灶，再進一步成為溫和派嘅共主。不過，民主阿婆呢個共主幻想好快就夢碎，尋日記者會不但冇宣布新平台面世，分屬溫和泛民主派嘅民主黨（白鴿黨）又冇影，民主阿婆發揮政治餘熱嘅幻想再次以失敗告終。
話說民主阿婆尋日搵泛民代表會面商討未來合作，除咗佢旗下「香港2020」成員齊集，溫和泛民代表有衞生服務界李國麟、資訊科技界莫乃光、公民黨湯家驊、民協馮檢基等，之不過威脅退出真普聯嘅白鴿黨就冇影，即使十八學者只派出陳智傑一人做代表，都係非外界熟悉嘅核心人士，而且遲到早退。佢哋前後會面約一小時後就收檔會見傳媒。
民主阿婆喺記者會上冇石破天驚嘅消息公布，辯稱白鴿黨等政黨尋日無代表出席，係因為打算下周才會面，其後更疑似為佢嘅溫和共主夢碎死撐。事實上尋日連聲明都冇份，最有共識內容算係爭取真普選、無篩選選舉，真係講咗等於冇講，民主阿婆都係返去湊孫好過喇。