政情：「小八國聯軍」殺埋身
美國駐港總領事夏千福（Clifford A.Hart）來港唔夠一年，作風高調兼頻頻落區做騷，前日又以高姿態搞事，帶埋英國、日本、加拿大、澳洲、新西蘭、印度同德國嘅七國領事組成「小八國聯軍」，浩浩蕩蕩進軍深水埗區，有個場合個個領事仲攞住把刀，擺出咁嘅姿態究竟想點呢？相反應該當家作主嘅港府高官落區冇影，變相將落區主動權拱手相讓畀乘勢崛起嘅「小八國聯軍」，真係唔爭氣。
吳若蘭擬六四搞搞震
曾經被中方點名批評經常在港搞風搞雨嘅夏千福，粗略估計喺不足一年時間，至少有十多次落區同公開出席各類型活動，包括今年初到前任行政長官辦公室密會「貪曾」前特首曾蔭權爵士，又曾被本報直擊到上環買暖水壺、就連觀音借庫都關佢事要視察，至於其他飲飲食食行動，好似食雞蛋仔、奶油豬、飲涼茶等次數更係多不勝數，每次例必影相擺上網。
及至前日，夏千福更有恃無恐，破天荒率領「小八國聯軍」出動，到訪深水埗「惜食堂」同免費派飯畀窮人嘅明哥，而且仲買埋飯券表示支持添。據聞最新消息係「小八國聯軍」成員之一、英國駐港總領事吳若蘭（Caroline Wilson）接力有新搞作，打算喺六四事件廿五周年當日，邀約建制、泛民代表共進早餐，地點係司徒拔道扭紋豪宅。之不過吳若蘭咁多日子都唔揀，揀正六四正日先有動作，當中嘅政治訊息，真係路人皆見。
CY正外訪斯德哥爾摩
「小八國聯軍」崛起代勞落區既成事實，關鍵係作為港府之首嘅梁振英（CY）用嚟聽意見嘅一支筆、一本簿同一張摺櫈收埋咗、封晒塵，起碼過去半年間未見佢公開同市民有近距離接觸。事實上，CY過去一個月嘅心思也不在香港，先係上月廿六日一連放假十日，期間就山長水遠去到法國出席活動。依家「小八國聯軍」打到嚟，CY又身在瑞典斯德哥爾摩參觀當地嘅環保科技及鐵路網絡，被人剃眼眉都唔知咩事。
講到底，普羅市民嘅心理好簡單，見到邊個親臨噓寒問暖，理得佢係高官或是別有用心嘅人都會受落，依家港府落區主動權拱手相讓畀「小八國聯軍」，咁就要承擔將來嘅一切後果。