政情：中環出更：嫻姐抗拉布 着裙貪方便
立法會繼續就財政預算案撥款「拉布」。議員為咗解悶，有人趁機會睇書，有人食話梅提神，有人上網睇節目，亦有人用手機影雀自娛，而議員陳婉嫻竟然為對抗「拉布」唔着褲！話說嫻姐尋日着咗條淺綠色、膊頭有通花圖案嘅連身裙，十分醒神，點知佢就話係特登為「拉布」而着嘅，因為着裙行路會快啲，就連去洗手間都快啲、方便啲喎。
坐足成日 要通爽啲
嫻姐話，因為「拉布」要喺會議廳坐足成日，所以要着得通爽啲。不過，原來佢呢條連身裙要過千元，仲係幫襯批發及零售界議員方剛嘅服裝品牌。佢仲話，呢個品牌佢已幫襯咗好耐，因為啲裙質地好，着得好舒服咁話。為咗對抗「拉布」嘅沉悶，嫻姐仲收到妹妹送贈嘅公仔耳筒防塵塞，等佢開會睇住啲可愛嘅公仔會冇咁悶。
嫻姐仲自爆，佢好鍾意買動物公仔，試過喺屋企張梳化擺成十隻八隻公仔，幾乎冇位坐咁滯。佢話，細個時媽媽擔心有人會利用公仔做違法事，所以唔准佢買，但佢就覺得人生應該多啲色彩，所以都係難捨呢鋪「公仔癮」。
卓妮