政情：中環出更：何緯豐山西拍片有明燈
山西有唔少煤礦「金主」，近年四出尋商機，香港自然成為集資好地方。雲集香港及山西企業家嘅「香港山西商會」，前晚舉行首屆會董就職禮，創會會長胡曉明（Herman）帶頭捐出一幅名畫籌款，又憑住自身多年來對體育嘅經驗，協助一班香港微電影發燒友去海拔千五呎嘅山西拍片參賽，提升參賽者嘅心理質素。
山西風景優美，而且富有獨特嘅風俗和歷史，微電影比賽於當地取景，相信不難找到好題材。雖然Herman冇份帶隊，但當佢知道會董何緯豐（Vincent）任團長，即時提出擔任特訓顧問「過兩招」，教授隊友心理戰術兩小時。由於今次拍攝比賽限時四十八小時內完成，所以Herman提醒大家要飲多啲水、夠瞓及保持頭腦清醒。
港微電影之父
其實Vincent有「香港微電影之父」之稱，拍攝難佢唔到，但山長水遠去到山西，單係攝影器材已經好重，真係未開拍先手軟，好彩同行有五位年輕人幫手。至於有冇機會揚威，大家就要拭目以待喇。
講到山西，Herman同中華總商會榮譽會長霍震寰（Ian）嘅祖宗喺幾千年前同山西有淵源，難怪兩人拍住創會，而Ian仲派出兒子霍啟文做副秘書長添。山西煤炭、冶金、文物及旅遊生意，具有極大發展潛力，吸引港商去考察，從事燃氣生意嘅常董周浩雲正考慮到當地投資，計劃將山西煤炭製成天然氣，提供環保能源。
卓妮