教育嘅成敗，關乎社會嘅未來及發展，尤其係大學教育，更加可以反映一個地方嘅命運。曾幾何時，本港學府嘅國際排名一直名列前茅，可惜近年就同香港整體競爭力一樣，跌跌不休，真係可悲，呢啲咪就係香港不斷沉淪嘅證明囉。
唔係危言聳聽，國際高等教育研究機構Quacquarelli Symonds日前公布嘅最新一屆亞洲大學排行榜，本港大學首次失去亞洲榜首寶座，曾連續三年榮登榜首嘅香港科技大學今年急跌至第五位，而「百年老店」香港大學亦由去年第二位跌至第三位，相反，新加坡國立大學就成功攀升為亞洲一哥，韓國科學技術院躍升四級至第二位。該項排名係根據學術聲譽、僱主評分、師生比例、平均發表論文及國際化等標準評審，選出亞洲首三百間大學，本港話就話有七間大學榜上有名，但只得中文大學及城市大學微升一名，分別排第六及十一位，其餘大學排名都係不進則退。
點解會咁？該機構認為本港大學嘅「雙軌年」影響大學師生比例，削弱本港優勢，其實，呢個只不過係表面原因，真正原因係本港投放喺科研方面嘅資源不足，導致競爭力每況愈下，而星韓政府就不惜工本發展科研，此消彼長咯喎，本港大學被後來居上又有乜出奇吖。正如教育界人士話齋，星韓近年銳意發展科研，對大學投放大量資源，加上兩地刻意吸納海外著名嘅創意藝術院校，向國際化發展，反觀本港對科研撥款雖有增加，但院校之間競爭非常大，香港發展產業始終講多過做。
冇錯嘞，一分耕耘，一分收穫，港府唔肯喺科研方面付出，大學又點可能有收成呢？早前英國《泰晤士高等教育》公布嘅最新全球大學名氣榜，本港排名最高嘅港大較去年急跌七位，只能排第四十三位，創下歷史新低，被亞洲排名最高、全球排二十一位嘅新加坡國立大學愈拋愈遠。調查機構當時已警告香港必須提升競爭力，否則喺亞洲區嘅優勢可能不保，結果不幸而言中，香港學府痛失亞洲一哥寶座，就係一個嚴重警號，最怕低處未算低吖！
當然喇，冰凍三尺非一日之寒，本港學府漸走下坡，唔係一朝一夕，亦唔係單一原因，校園愈來愈政治化亦可能有影響。今時今日，部分教師同學生搞政治多過搞學術，連大學民調亦被指淪為政治工具，寧靜嘅象牙塔成日嘈喧巴閉，教學質素同學術水平唔跌至奇喇。
正所謂，無可奈何花落去，香港回歸後樣樣退步，又點止大學排名下跌吖。有人話香港氣數已盡，只會繼續沉淪，直至滅亡，唔通真係一語成讖？