權力一旦失察失管，放任自流，「盛事」往往變成混帳事一籮籮！冇錯，老朽所感嘆嘅就係旅遊事務署旗下的「盛事基金」，佢每年資助唔同團體數以百萬元計，大搞所謂「旅遊盛事」。
審計署報告批評，盛事基金成立至今，花費近一億元，共批出二十四項基金盛事，但有十八項是重辦或每年皆舉辦的項目。
換言之，所謂「盛事」，無非係「聲大大，無貨賣」，最叻亦不過係炒冷飯！了無新意嘅活動，根本無力吸客，而獲資助嘅團體，被揭發「浮報開銷」者有之，「隱瞞利益」者有之，吹水創新紀錄者有之……
審計報告透露，廉署二○一○年九月，曾對盛事基金發表審查工作報告，建議進一步完善申請程序，防止基金機制衍生貪污問題。廉署又關注基金是否有必要繼續運作，因為基金是於經濟困難時期設立，而經濟情況已經改變，故建議旅遊事務署應考慮將未用撥款退還政府，但政府未有接納建議，基金其後仍繼續運作。
查盛事基金在二○○九年五月成立，獲批一億元；二○一二年四月加批一億五千萬元。查曾蔭權任期由二○○七年三月二十五日至二○一二年六月三十日；即係話，廉署於一○年建議政府「進一步完善申請程序」，曾蔭權政府不但當耳邊風，尋且在距離任前兩個月，更為盛事基金注多一億五千萬元。
所以話，貪曾處事為政，倒行逆施，彰彰明甚！
若然佢當年接納廉署建議，就不會搞出「盛事基金」變「混帳分金」！「邪人說正法，正法悉皆邪」，「盛事」盡變醜事，香港繼續沉淪，勝在有貪曾埋下之無數地雷。