政情：食衞局前政助 陳智遠做智囊
中央政策組不時更新同邀請社會各界人士成為中策組特邀顧問。中策組網頁最新資料顯示，食物及衞生局前政治助理陳智遠（Paul），最近以活現香港創辦人身份，獲邀成為三十名中策組特邀顧問之一。唔知阿Paul會否對老本行，即同食物及衞生有關嘅課題特別有興趣呢？
翻查資料顯示，阿Paul自從前年離開官場後，熱愛旅行嘅佢既做導遊兼出書做作家。好似早前佢有本新書，就係同讀者分享佢走過七十八個國家嘅故事，今年仲有份創辦本地文化遊，名為活現香港行街團，生活認真多姿多采。
值得一提嘅係，早前有傳城大學者張楚勇未有連任中策組特邀顧問。
據張楚勇身邊嘅人話，張目前正在台灣遊學，因此佢嘅名字暫時未在名單上，料返回香港後就會歸隊。
其他新加入嘅中策組特邀顧問有香港基督教女青年會總幹事楊建霞、浸大社會科學院體育學系講師梁家文等人。