政情：夏千福率隊 「小八國聯軍」代港府出巡?
曾經畀中方點名批評成日喺香港搞風搞雨嘅美國駐港總領事夏千福（Clifford A. Hart），尋日又再搞事，今次仲帶埋英國、日本、加拿大、澳洲、新西蘭、印度同德國嘅七國領事，浩浩蕩蕩進軍深水埗區。莫非因為香港班高官自知落街會畀人鬧，近排甚少落區，要改由夏千福組成「八國聯軍」代勞？
夏千福來港唔夠一年，不但經常約會香港反對派人士密會傾偈，佢自己亦經常造訪香港不同地區及名勝，嘗盡各種傳統或地道美食，然後再影埋相放上網，慌死中方唔知佢喺香港搞搞震。尋日佢又帶同另外七個國家嘅駐港領事，一齊到訪深水埗「惜食堂」，免費幫手派發食物畀香港啲弱勢社群。不過，根據英國駐港領事館上載嘅相片，個個領事都攞住把刀，中方見到都咪話唔驚！
「八國聯軍」之後再去咗該區一間燒臘飯店，探訪免費派飯畀窮人派到出晒名嘅明哥。眾人拍攝完大合照之後，再品嘗吓明哥間燒臘店嘅馳名香脆燒腩仔，據聞個個事後都讚不絕口喎。