早前喺立法會聽證會高調反對全民退休保障嘅自由黨青年團主席李梓敬，因被基層婆婆以粗口大罵，又加上公然打機玩「轉珠」，隨即成為網民公敵。
至今隔咗有十幾日，李梓敬一直未有現身，不但絕迹所有公開場合，就連喺活躍開嘅網上平台都冇晒影。據聞有黨高層下令叫佢「潛水」一頭半個月，以免有機會被網民圍剿，等事件丟淡後先可以再「開聲」。
其實唔少黨高層都睇好李梓敬，所以今次佢玩出火，班高層苦口婆心叫佢低調一輪先，以免佢繼續成為炮灰。本來打死唔認錯嘅李梓敬，出事後翌日即刻出道歉聲明，而佢都好聽班高層講，即刻自我隱形一段時間，避免事件升溫發酵。打機認衰 「今後檢點啲」
靜咗一輪後，李梓敬日前向我哋解釋，聲稱唔係被黨高層下令「滅聲」，只係希望多做地區工作。至於點解絕迹網上平台，佢就話因為過去幾日都要帶街坊旅行團去佛山，所以冇乜時間上網喎。
佢仲話，雖然唔少街坊撐佢反對全民退保嘅言論，但佢自己諗深一層，覺得喺議事廳中打機始終唔太適當，聲稱今後言行舉止會檢點啲喎。