政情：丟架主席曾鈺成遇示威唔做嘢 盧偉國轉場開會避難

對拉布寬鬆捱轟

尋日工務小組委員會審議政府「一堆一爐」建議，但會議上就有公眾人士喧嘩、擾亂會議秩序，盧偉國屢勸不果，而保安員又請唔走啲人下，最後竟然選擇轉到其他會議室開會，簡直係創咗立法會嘅先河。

委員會暫停會議四十五分鐘後，喺另一會議室繼續就議員范國威提出嘅一百零四項修訂進行表決。由於該會議室冇電子表決系統，搞到議員舉完左手舉右手，舉多兩舉自然火都滾。

建制派議員王國興就話有關修訂只係改幾隻字又再重新提出，質疑係重複，要求盧偉國裁決究竟係咪要處理呢啲「拉布」修訂，就連泛民主派議員陳家洛都質疑部分修訂究竟同擴建堆填區有咩關係。

點知盧偉國就一味話會聽議員意見，但就對議員質疑不作解釋，激到王國興大鬧盧偉國：「你對『拉布』就寬鬆！」盧偉國會後就話，擔心反對提出修訂會引起爭拗，到時仲嘥時間喎。

議員促議廳設欄

咪以為新丁盧偉國經驗尚淺先被人鬧，資深嘅曾鈺成尋日都喺行政管理委員會閉門會議上被人狠批，據聞其中對佢不留手嘅仲包括黨友黃定光（象哥）。

話說尋日行管會就議員梁國雄（長毛）早前喺會議上對財政司司長曾俊華掟陰司紙一事進行討論。象哥同議員吳亮星就鬧爆曾鈺成作為大會主席都唔做嘢，要求以後喺會議廳內加設圍欄，防止議員衝出嚟，以及要喺長毛座位附近增加保安人手。

象哥仲話，曾鈺成成日縱容長毛，下次佢都衝埋出嚟，好似台灣佔領立法院咁喎。秘書處最後就提出會增加保安員人手，至於加設圍欄就要諮詢其他議員。