中環出更：肥亨：「馬拉松」係吹水

商務及經濟發展局前局長馬時亨（肥亨）同前財政司司長梁錦松（阿松）相識四十四載，二人老友鬼鬼，難怪早前盛傳肥亨有意推舉阿松參選下屆特首，因而被喻為「馬拉松」。不過，肥亨尋日接受電視台訪問嘅時候坦言，推舉阿松參選特首純粹吹水，仲引述阿松話冇計劃參選特首，所謂嘅「馬拉松」係流嘢喎！

肥亨笑言，阿松最近向佢投訴，堅稱自己無意參選特首，唔好令人有誤會喎。肥亨話，佢個人好想擔任阿松嘅競選經理，但照阿松目前咁講法，相信應徵都係「失業」居多喇。阿松唔選啫，點解肥亨唔自己親身上陣？肥亨再次話自己有病，六年前都係因病離開政府，斷言「可以假定我係完全唔會行返入呢個圈子」。

雖然肥亨唔選，但都有幾句贈畀下屆特首，認為對方要「有心有力」，首要毫無私心咁服務市民，同時兼備能力、親和力同凝聚力。

卓妮