中環出更：行善生力軍 牛氣十足
慈善事業勝在眾志成城，早前國際小母牛香港分會舉行慈善晚宴，籌款委員會主席兼「快勞夾大王」杜振源（Simon）再次在旗下酒家筵開十一席，邀請一班城中老友包括香港賽馬會大董葉澍堃（Stephen）夫婦、莎莎國際主席郭少明夫婦及佳能香港副總裁鄧慶治（Mingo）去支持，今年仲多咗年輕人加入，可以話係老中青齊晒腳。
當晚現身嘅新面孔有香港青年聯會常務會董張詩培及東華三院總理廖偉麟（Jeffrey），佢哋都係新加入做小母牛委員。Jeffrey家姐廖偉芬及一班年輕人拉隊去支持，而Jeffrey亦身體力行，用二十萬元投得Simon捐出嘅1982年法國佳釀。
卓妮同場仲見到上月加入仁濟醫院做總理嘅羅氏針織後人羅穎怡，佢話用咗一年時間去巴黎修讀商業管理碩士學位，今年初學成歸來，大展拳腳。
「杜葉鄧」齊抱孫升呢
慈善晚宴氣氛熱鬧，眾人踴躍競投拍賣品，話咁快籌得逾五百萬元善款。卓妮仲聽到場內恭喜聲此起彼落，原來繼Stephen及Simon先後升呢做爺爺之外，Mingo亦唔執輸，佢兒子鄧振豪亦幫佢添咗名乖孫，難怪當晚不停有老友向佢哋三位道賀。加上小母牛籌款委員會副主席王庭聰愛女王麗霞已有身孕三個月，相信將來小母牛又會增添一班生力軍。
卓妮