學廣告話齋，今時今日咁嘅服務態度點得。港鐵年賺逾百億元，而服務水平就每況愈下，除咗事故無日無之，連高鐵工程都搞到一鑊泡，咁差劣嘅服務態度，係咪應該有人問責受罰呢？
事實啱啱相反，港鐵醜聞多多，有口皆悲，結果唔止冇人受罰，反而有賞添。係人都知，對於高鐵延誤醜聞，港鐵行政總裁韋達誠負有不可推卸嘅責任，佢冇做好監管在先，隱瞞事實在後，能力同誠信都備受質疑，就算唔炒魷都要扣人工啦，偏偏港鐵無視民意，居然准許韋達誠繼續做到明年八月約滿，到時約滿酬金袋袋平安，咁唔係獎賞又係乜吖？
最離譜嘅係，港鐵主席錢果豐仲大讚韋達誠多年來工作表現備受肯定喎。港鐵事故頻頻，三日一小錯，五日一大錯，咁嘅表現都話備受肯定，簡直係侮辱港人智慧。正如有立法會議員話齋，韋達誠監管工程不力已經係死罪，對工程落後「瞞上瞞」更加係罪無可恕，港鐵公然放生，市民點會收貨吖！
嗱，群眾眼睛係雪亮嘅。「東方報業民意調查」顯示，對於高鐵工程延誤，港鐵涉嫌隱瞞，三成八受訪者認為管理層管理不善；三成六批評專業失準，浪費公帑；兩成一直指港鐵誠信破產。對於韋達誠拒絕辭職，仲可以做到任期完結，五成一表明不接受，應立即引咎辭職；兩成二認為佢不負責任，死不悔改；兩成一對港鐵只係道歉，輕輕放下不收貨。
喺輿論壓力之下，港鐵煞有介事成立委員會調查事件，但事先張揚唔係要查找邊個失職，而係檢討溝通上有何不足喎。高鐵爆出咁大醜聞，港鐵只係歸咎於溝通有問題，擺明文過飾非，你話咁嘅調查究竟有乜意義吖？講到底，港鐵之所以有恃無恐，皆因得到港府包庇，作為港鐵最大股東，港府平時對港鐵放任自流，連高鐵咁重要嘅基建都唔監唔管，點可能唔出事吖。張炳良身為問責局長，監管不力已經難辭其咎，仲配合港鐵講大話欺騙公眾，簡直豈有此理。調查顯示，三成五受訪者認為港鐵及港府存心欺瞞，罪加一等；三成一斥互相包庇，助紂為虐；兩成八直指港府淪為橡皮圖章。
曾幾何時，港鐵係港人引以為傲嘅品牌，家陣淪為事故不斷、醜聞多多嘅代名詞，講起真係可悲。四成二受訪者直斥港府未做好監管角色；三成直指失職，姑息養奸；兩成三認為須研究新機制，加強監管。呢嗱，民意昭昭，今次事件絕對唔能夠輕輕放過，港府同港鐵必須交代清楚，有責必問，咪使旨意蒙混過關呀！