政情：蔣麗芸搞山寨版「慧妍雅集」
尋日母親節，好多立法會議員都例牌落區送花顯溫馨，但議員蔣麗芸（Ann）就選擇大搞烹飪比賽兼做埋評判，因為個比賽由阿Ann一手創立嘅婦女團體「藝慧芸集」舉辦。咦，點解個名咁似港姐組織「慧妍雅集」嘅？唔通阿Ann想搞個山寨版慧妍雅集？阿Ann就話，雖然概念相似，但其組織主打三十歲到五十幾歲嘅婦女，希望師奶都可以做到「藝術與智慧雲集」喎。
與另一黨友「合組」
原來藝慧芸集已經成立咗一年，一直以舉辦烹飪同健身班為主，大受九龍城區內婦女歡迎。但老老實實，阿Ann唔用自己政黨名義搞活動，反而創立呢啲衞星組織，而且個名稱仲係佢同另一位黨友名字嘅組合，係咪想借烹飪為名、吸票為實先？阿Ann就話冇咁嘅事，但承認個名有參考過「慧妍雅集」，貪個名夠靚喎。不過，既然九龍城婦女有份創立組織，咁點解唔叫「九芸慧」呢？
講番母親節，阿Ann發現近年兩落區送花，都係男士領情多，佢估計係因為啲男人善忘，見到佢先知係母親節，就嗱嗱聲去「借花敬妻」。如果係咁，以後唔派畀男士咪得囉！