審計署上月發表報告狠批民政事務總署設立嘅「伙伴倡自強」計劃，在處理申請嘅審批程序漫長，平均需要二百三十九日，而立法會議員亦批評唔少社企喺成立後幾年內相繼倒閉，質疑社企政策係「口惠而實不至」。不過，民政事務局局長曾德成尋日仍發表網誌死撐社企有成效，九唔搭八話盛讚社企喺商業模式同服務類型等方面都愈趨多元化，但絕口不提該署審批程序歎慢板，認真離譜。
德成局長話，「伙伴倡自強」計劃成立時係以扶貧同創造就業為目標，但依家新辦嘅社企追求多種公益目標，數據更加顯示本港社企數目穩定增長。而總結社企過去嘅發展經驗及專家意見，考慮下一階段為社企更新支援策略同項目。講足成千字，德成局長都冇提到點樣改善審批程序，正如審計報告所講，阻延社企開業或會令申請機構嘅熱忱減退，其至錯失良機，到時無論點樣更新支援策略都係徒然。