政情：高永文撐本地菜 一買廿斤
近年本土意識逐漸抬頭，市民連食菜都鍾意幫襯本地菜農。漁護署、蔬菜統營處及新界菜聯社有見及此，年初喺屯門藍地合辦「周日農墟」，專售本地出產嘅信譽蔬菜。呢個農墟尋日正式開幕，食物及衞生局局長高永文現身撐場，連掃全場廿幾檔菜檔，買咗廿幾斤菜返屋企，唔通佢一家人都改食素？佢話屋企食飯最少都有七、八個人，而且屋企人鐘意食菜，預計三、四日就可以「消耗」晒啲戰利品。
幫襯晒廿幾檔 塞滿車尾箱
以往每逢有局長落區撐場，好多時都係簡單幫襯吓就算，但尋日高永文一到藍地農墟就話要買菜，所以開幕儀式完成後，高永文急不及待走去掃貨。佢喺漁農界議員何俊賢陪同下，逐檔逐檔去買，仲要唔講價，無論係買西洋菜定買節瓜，一律二十元唔使找，檔主當然笑到見牙唔見眼啦，由於現場廿幾檔菜檔，佢總共使咗五百元買菜，塞滿晒成個車尾廂，好似個迷你菜田咁款。