政情：張宇人「轉性」辣慶打工仔
立法會內除咗泛民同建制派永遠處於對立面外，勞工界同商界亦係永遠「天敵」，每逢遇到勞資議題，商界就第一個行出來代表僱主講好說話，但每次都惹起唔少風波。好似最近立法會討論男士侍產假，飲食界議員張宇人（Tommy）一句「我轉咗性變咗男人，我都有侍產假喎」，隨即惹起勞工界不滿，令Tommy繼上次最低工資後再次被網民攻擊，唔知今次網民又會幫佢改咩花名呢？
話說前日立法會審議緊《僱傭條例》，將男士三天侍產假加入法例，放假期間亦可以八折支薪。點知Tommy就喺開會期間爆出金句，佢質疑法例一旦容許變性人有男士侍產假，係咪所有女士變性後，只要搵個大咗肚嘅女士做太太，然後嬰兒出世紙爸爸嗰欄填自己個名，就算唔係經手人都有三日侍產假呢？
話要政府找數
Tommy似乎講完仲未知衰，佢繼續發炮批評政府慷他人之慨，話侍產假唔應該由商界找數，仲話政府庫房「鬼死咁多錢」，不如由政府向所有企業補貼侍產假嘅支出喎。就係以上呢幾番說話，隨即被指為歪理，激嬲唔少勞工界團體，網上仲有多幅改圖諷刺Tommy，睇嚟佢一係唔講嘢，一講就撩起火頭，絕對係惹火人物。
其實Tommy亂講嘢都唔係第一次，成名之作首推當年立法會審議最低工資時，佢就話如果最低工資定喺廿蚊會對企業有好大影響，此言一出隨即被轟為無良僱主。直到前年又有另一單，當時立法會討論緊性傾向歧視條例係咪立法，佢無啦啦話驚僱主會因為對同性戀有唔同睇法而誤墮法網，又話擔心未婚員工會同普通朋友扮成伴侶一齊分享福利，令企業成本大大增加，令到支持同性戀團體向佢口誅筆伐。
Tommy身為飲食界代表，擔心侍產假增加企業成本係正常憂慮，但如果話變性人簽個名就有三日假，呢番說話真係冇乜道理，可以話邏輯上存在謬誤。因為每個嬰兒只會得一個爸爸，相信無一個媽媽願意出賣呢個名額，亦無一位爸爸會放棄呢三日侍產假畀其他變性人，更遑論為咗三日假去變性，所以Tommy點解咁諗，真係得佢至知喇。